Amanda Strydom vier mylpaalverjaardag in haar ‘eie kooi’

Een van Amanda Strydom se verjaarsdagwense het klaarblyklik vanjaar waar geword; ná byna drie weke in die hospitaal het sy die kersies vir haar 70ste verjaardag in haar “eie kooi” uitgeblaas. Strydom het vroeër op sosiale media gedeel dat sy in die hospitaal is nadat sy op 3 Julie beseer is toe sy by die InniBos-kunstefees geval het. Die geliefde aktrise en sangeres het gevolglik ʼn operasie aan haar linkerheup ondergaan en deurlopend gedeel dat haar herstelproses na wense gevorder het. Sy sou egter graag “tuis in haar eie nes” versorg wou word. “Die groot operasie op my linkerheup was ʼn reusesukses, die twee daaglikse sessies met terapeute om weer te leer loop (vir nou eers met ʼn loopraam) is uitmergelend, maar ek vorder fluks. Ek sal huis toe kan gaan sodra ek meer mobiel is. Ek mis ons huis, my eie bed en my Tony, hy kom elke dag hospitaal toe,” het Strydom op 20 Julie geskryf. Sy is twee dae later ontslaan en sterk nou aan by haar en haar man se huis in Westdene, Johannesburg. “Dis heerlik om tuis te wees en in my eie kooi te verjaar!” het sy Donderdag op Facebook, met ʼn foto van haar in die bed saam met goue ballonne, gedeel. Strydom se nuwe produksie, Sewentig, nog lewendig, maak later vanjaar sy buiging op die Toyota Stellenbosch Woordfees. Vanweë haar besering is optredes vir haar en Binnelanders-aktrise Je-ani Swiegelaar se Kanna-bekroonde vertoning Tillie/Mathilda op die Vrystaat Kunstefees in Bloemfontein egter gekanselleer. Strydom het in ʼn stemboodskap aan Maroela Media gesê dat sy dankbaar is om tuis te wees, maar dat daar “baie harde werk” vir haar voorlê wat fisioterapie betref. “Ek sterk baie stadig maar seker aan. Dit raak elke dag ʼn bietjie beter, maar hulle het my gewaarsku dat ek sommige dae baie moeër as ander sal voel – wat waar is. Ek leef verder in dankbaarheid dat ek aan die beweeg kan bly want dit is al hoe ons hierdie ou heup en been gaan regkry.”