Ukraine yarashe ku bubiko bunini bw'ibikomoka kuri peteroli bw'i St Petersburg mu Burusiya

Ukraine yarashe ku bubiko bunini bw'ibikomoka kuri peteroli bw'i St Petersburg mu Burusiya - Umwanditsi, Jaroslav Lukiv - Yatangajwe - Igihe co gusoma: iminota 3 Perezida wa Ukraine Volodymyr Zelensky yavuze ko ububiko bunini bw'ibikomoka kuri peteroli bwo mu mujyi wa St Petersburg mu majyaruguru ashyira uburengerazuba bw'Uburusiya bwarashweho n'ingabo za Ukraine mu ijoro rishyira ku gatandatu. Perezida wa Ukraine yavuze ko ubwo bubiko ari igikorwa-remezo cy'ingenzi "gitanga amafaranga y'intambara y'Uburusiya". Ukraine yanavuze ko ikigo cy'amato y'intambara cy'Uburusiya kiri muri ako karere na cyo cyarashweho. Guverineri wa St Petersburg, Aleksandr Beglov, yavuze ko uwo mujyi wagabweho igitero "kinini cyane" cy'indege nto z'intambara zitajyamo umupilote (zizwi nka 'drone'), yemera ko ubwo bubiko bw'ibikomoka kuri peteroli bwarashweho ariko avuga ko nta bantu bapfuye cyangwa ngo bakomereke. Mu gihe cya vuba aha gishize, Ukraine yakajije umurego w'ibitero byayo bya 'drone' byo mu ntera ndende igaba ku bikorwa-remezo by'ingenzi cyane by'ingufu by'Uburusiya, bituma ibikomoka kuri peteroli biba bicye henshi mu gihugu. Kyiv ivuga ko hafi 43% by'ubushobozi bw'Uburusiya bwo gutunganya ibikomoka kuri peteroli butagikora kubera ibyo bitero. BBC ntiyashoboye kugenzura uwo mubare mu buryo bwigenga. Ukraine ivuga ko ibigo by'Uburusiya by'ibikomoka kuri peteroli hamwe n'ibigo byabwo bya gaze ari ahantu hemewe ho kurasaho kuko Moscow icungira cyane ku bikomoka kuri peteroli yohereza mu mahanga kugira ngo ishobore kubona amafaranga yo gukoresha mu gitero gisesuye yagabye kuri Ukraine, cyatangiye muri Gashyantare (2) mu mwaka wa 2022. Ku wa gatandatu, Perezida w'Uburusiya Vladimir Putin – mu cyumweru gishize wemeye, mu buryo budakunze kubaho, ko ubucye bw'ibikomoka kuri peteroli bwatewe n'ibitero bya Ukraine – yashyize umukono ku mushinga w'itegeteko, wahindutse itegeko, ugamije kongera ibikomoka kuri peteroli ku isoko ry'imbere mu gihugu. Mu gitondo cyo ku wa gatandatu, Zelensky yavuze ko aharashwe i St Petersburg no mu nkengero zayo hari mu ntera ya kilometero hafi 850 uvuye ku mupaka wa Ukraine. Ingano y'ibyangiritse ntiyahise imenyekana ariko videwo yatangajwe na Perezida wa Ukraine yagaragaje 'drone' iguruka yerekeza ku ho yari igiye kurasa, n'umwotsi mwinshi cyane w'umukara uzamuka uva muri ako gace nyuma y'igitero. Nyuma BBC yaje kugenzura isanga ububiko bw'ibikomoka kuri peteroli bw'i St Petersburg bwarashweho. Igisirikare cya Ukraine cyasobanuye ubwo bubiko nka "bumwe mu bunini cyane" mu Burusiya, bufite ubushobozi bwo gutanga toni miliyoni 12.5 z'ibikomoka kuri peteroli buri mwaka. Cyanavuze ko cyarashe ku kigo gikomeye cy'amato y'intambara y'Uburusiya ari mu nyanja ya Baltique kiri i Kronstadt. Uburusiya nta cyo bwatangaje ku mugaragaro kuri ibyo bivugwa na Ukraine. Guverineri Beglov yavuze ko 'drone' 72 za Ukraine zahanuriwe hejuru y'umujyi wa St Petersburg n'ahandi ho mu karere ka Leningrad.